Səudiyyə Ərəbistanının dövlət neft şirkəti Saudi Aramco Avropadakı ən azı iki neft emalı şirkətinə oktyabr ayında uzunmüddətli müqavilələr üzrə xam neft tədarük etməyəcəyini bildirib. Bu vəziyyətin Avropadakı bütün müştərilərə şamil oluna biləcəyi bildirilir.
Monetar.az xəbər verir ki, neft tədarükündə yaranan problemin əsas səbəbi Səudiyyə Ərəbistanının əsas neft kəməri olan “Şərq-Qərb” magistralına pilotsuz uçuş aparatları ilə hücum edilməsidir. Hücumdan sonra kəmərin fəaliyyəti dayanıb.
Avropadakı neft emalı zavodları adətən Səudiyyə neftini uzunmüddətli, aylıq bərabər həcmdə tədarükü nəzərdə tutan müqavilələr əsasında alırlar. Bu səbəbdən tədarükün dayanması Avropa şirkətlərini alternativ mənbələr axtarmağa məcbur edir.
Polşanın Orlen şirkətinin artıq alternativ neft tədarükü axtardığı bildirilir. Tədarük narahatlıqları regional neft markalarının qiymətlərinə də təsir göstərib. “Dated Brent” neftinin qiyməti həftə ərzində qısa müddətə bir barel üçün 130 dolları keçib.
Saudi Aramco kəmərin fəaliyyətini yaxın günlərdə qismən bərpa etməyi və təxminən altı həftə ərzində tam gücə çatdırmağı planlaşdırır.
Şirkət Asiyadakı müştərilərinə Fars körfəzi üzərindən spot neft partiyaları təklif etməyə başlayıb. Lakin Avropa üçün alternativ tədarükün təşkili daha mürəkkəbdir. Neftin Avropaya çatdırılması üçün gəmilər Qırmızı dənizdən keçməli və ya Afrikanı dolanaraq daha uzun marşrutdan istifadə etməlidir.
Avropadakı neft emalı zavodları Səudiyyə neftini əsasən Misirin Aralıq dənizi sahilində yerləşən Sidi-Kərir limanından qəbul edir. Liman Qırmızı dənizlə boru kəməri vasitəsilə əlaqəlidir.
Beləliklə, Səudiyyə neftinin Avropaya tədarükündə yaranan fasilə regionun neft bazarında əlavə təchizat riski yaradır və alternativ mənbələrə tələbi artırır.
