Dünyanın 30 böyük şəhərində yeni avtomobilin qiyməti əhəmiyyətli dərəcədə fərqlənir. Ən yüksək qiymət Sinqapurda qeydə alınıb. Burada yeni avtomobilin orta qiyməti 156,2 min dollar təşkil edir.
Monetar.az xəbər verir ki, Deutsche Bank və Numbeo məlumatları əsasında hazırlanan müqayisədə Volkswagen Golf 1.5 və ya ona ekvivalent yeni avtomobilin qiyməti əsas götürülüb.
Sinqapurda yeni avtomobilin qiyməti ikinci yerdə olan Təl-Əvivdən də təxminən 2,7 dəfə yüksəkdir. İsrailin paytaxtında yeni avtomobilin orta qiyməti 57,9 min dollar olub.
İlk üçlükdə 51,3 min dollarla Kopenhagen qərarlaşıb. İstanbul isə 49,1 min dollarla dördüncü yerdədir.
Sonrakı pillələrdə Oslo 47 min, Honq Konq 44,6 min, Cenevrə 44,1 min, Amsterdam 42,3 min və Kuala Lumpur 41,8 min dollarla yer alıb.
Müqayisədə Moskva da diqqət çəkir. Rusiyanın paytaxtında yeni avtomobilin qiyməti 39 min dollar təşkil edib. 2016-cı illə müqayisədə bu göstərici 134 faiz artıb.
ABŞ şəhərlərində qiymətlər daha aşağıdır. San-Fransisko və Los-Ancelesdə yeni avtomobilin qiyməti 37 min dollar, Bostonda isə 36,6 min dollar olub. Nyu-York və Parisdə isə qiymət təxminən 35 min dollar səviyyəsindədir.
Sinqapurun digər şəhərlərdən kəskin fərqlənməsinin əsas səbəblərindən biri avtomobil sahibliyinin məhdudlaşdırılmasıdır. Ölkədə avtomobil almaq üçün 10 il müddətinə qüvvədə olan Sahiblik Sertifikatı (COE) əldə etmək tələb olunur. Sertifikatın qiyməti bəzi dövrlərdə 100 min dollara yaxınlaşıb.
Müqayisə göstərir ki, avtomobilin ilkin qiyməti onun ümumi xərcinin yalnız bir hissəsidir. Məsələn, ABŞ-da yeni avtomobilin alınması ilə yanaşı, yanacaq, sığorta, texniki xidmət və digər xərclərlə birlikdə illik sahiblik və istismar xərci orta hesabla 12 863 dollar qiymətləndirilir.
Beləliklə, eyni tipli yeni avtomobilin qiyməti şəhərdən asılı olaraq on minlərlə dollar fərqlənə bilər. Vergilər, idxal xərcləri və avtomobil sahibliyi ilə bağlı qaydalar bu fərqlərin əsas səbəbləri arasında yer alır.
