2026-cı ilin yanvar-avqust aylarında Azərbaycanda hava nəqliyyatı ilə sərnişin daşınması xidmətlərinin qiymətləri əvvəlki ilin eyni dövrü ilə müqayisədə 16,5 faiz, metro xidmətlərinin qiymətləri isə 20 faiz artıb.
Monetar.az xəbər verir ki, Dövlət Statistika Komitəsinin məlumatına görə, hesabat dövründə dəmir yolu ilə sərnişin daşınması xidmətlərinin qiymətləri 4,2 faiz, avtomobil nəqliyyatı ilə sərnişin daşınması xidmətlərinin qiymətləri isə 2,9 faiz yüksəlib.
Hava nəqliyyatı xidmətlərində qiymət artımı digər əsas sərnişindaşıma növləri ilə müqayisədə daha yüksək olub. 2026-cı ilin avqustunda bu xidmətlərin qiymətləri iyul ayı ilə müqayisədə 3,5 faiz, əvvəlki ilin avqust ayı ilə müqayisədə isə 9,5 faiz artıb.
Avtomobil nəqliyyatı ilə sərnişin daşınması xidmətlərinin qiymətləri avqustda iyulla müqayisədə dəyişməyib. İllik müqayisədə isə 3,2 faiz artım qeydə alınıb.
Metro xidmətlərində isə 2026-cı ilin yanvar-avqust aylarında qiymətlər ötən ilin eyni dövrü ilə müqayisədə 20 faiz yüksəlib. Dəmir yolu nəqliyyatı xidmətlərində illik artım 4,2 faiz təşkil edib.
Müqayisə üçün, 2025-ci ilin yanvar-avqust aylarında avtomobil nəqliyyatı ilə sərnişin daşınması xidmətlərinin qiymətləri 11,5 faiz, hava nəqliyyatı xidmətlərinin qiymətləri isə 5,9 faiz artmışdı.
