Apple şirkətinin gələcək nəsil smartfonu iPhone 18 haqqında ilkin məlumatlar yayılıb. İnsayder məlumatlarına əsasən, yeni model xarici görünüş baxımından sələfi iPhone 17-yə bənzəsə də, texniki göstəricilər və gündəlik istifadə imkanları baxımından bir sıra yeniliklərlə təqdim oluna bilər.
Gözlənilən dəyişikliklərdən biri batareyanın tutumunun artırılmasıdır. Apple-ın iPhone 18 modelində daha böyük akkumulyatordan istifadə edəcəyi bildirilir. Bununla belə, batareyanın dəqiq tutumu hələ açıqlanmayıb. Müqayisə üçün qeyd edək ki, Avropa bazarı üçün nəzərdə tutulan iPhone 17 modelinin nominal batareya tutumu 3 692 mAh təşkil edir.
Yeni smartfonun digər mühüm yeniliyinin Apple A20 prosessoru olacağı ehtimal edilir. Çipin TSMC tərəfindən 2 nanometrlik texnoloji proses əsasında istehsal ediləcəyi gözlənilir. Bu texnologiya cihazın hesablama performansını yüksəltməklə yanaşı, enerji sərfiyyatının azaldılmasına da imkan yarada bilər.
İlkin məlumatlara görə, baza iPhone 18 modelinin ekran xüsusiyyətləri əvvəlki nəslə yaxın olacaq. Smartfonun 120 Hz-ə qədər yenilənmə tezliyini dəstəkləyən 6,3 düymlük OLED ekranla təchiz ediləcəyi bildirilir. Dynamic Island dizaynının da qorunacağı ehtimal olunur.
Kamera sistemində isə arxa paneldə iki modulun yerləşdirilməsi gözlənilir. Həm əsas, həm də ultra-genişbucaqlı kameranın 48 meqapiksellik təsvir ölçüsünə malik olacağı iddia edilir.
Yeni modelin qiyməti ilə bağlı da ilkin ehtimallar var. Digital Chat Station insayderinin məlumatına əsasən, iPhone 18-in satış qiyməti əvvəlki nəsillə müqayisədə daha yüksək ola bilər. Lakin Apple bu barədə hələ rəsmi açıqlama verməyib.
Təqdimat qrafikində də dəyişiklik gözlənilir. İlkin proqnozlara görə, iPhone 18 Pro və iPhone 18 Pro Max modelləri 2026-cı ilin payızında təqdim edilə bilər. Baza iPhone 18 modelinin anonsu isə 2027-ci ilin yazına planlaşdırıla bilər.
Yeni modelin təqdimatı ilə eyni dövrdə iPhone 18e və ikinci nəsil iPhone Air smartfonlarının da nümayiş etdiriləcəyi ehtimal olunur.
Qeyd edək ki, sadalanan texniki xüsusiyyətlər və təqdimat tarixləri hələlik rəsmi təsdiqini tapmayıb. Buna görə də yekun göstəricilər Apple-ın açıqlayacağı məlumatlardan asılı olacaq.
MONETAR.AZ
