Azərbaycanda mədənçıxarma sektoru qeyri-neft ixracında rolunu artırır. 2026-cı ilin ilk yarısında qızıl, mis və alüminium ixracının ümumi dəyəri 397 milyon dollara çatıb.
Monetar.az xəbər verir ki, hesabat dövründə ilkin qeyri-monetar qızıl ixracının dəyəri 202,2 milyon dollar, xam mis konsentratının ixracı 135,9 milyon dollar, alüminium məhsullarının ixracı isə 58,9 milyon dollar təşkil edib.
Məlumata görə, mis ixracında xüsusilə kəskin artım qeydə alınıb. Belə ki, 2025-ci ilin ilk yarısında 12,3 milyon dollar olan mis ixracı 2026-cı ilin eyni dövründə 135,9 milyon dollara yüksəlib.
Qeyd olunur ki, statistikada göstərilən qızıl ixracına monetar qızıl daxil deyil. Mədənlərdə hasil edilərək xarici bazarlarda satılan qeyri-monetar qızıl xarici ticarət statistikasında ixrac kimi əks olunur. Monetar qızıl isə dövlət ehtiyatlarının tərkibində maliyyə aktivləri kimi nəzərə alınır.
Azərbaycanda mədənçıxarma sektorunun əsas iştirakçıları arasında “Anglo Asian Mining” və “AzerGold” şirkətləri yer alır. Mədənçilik fəaliyyətinin genişlənməsi və beynəlxalq əmtəə qiymətlərinin əlverişli olması ixrac göstəricilərinin artmasına təsir edən amillər kimi qiymətləndirilir.
Beləliklə, qızıl, mis və alüminium ixracının artması mədənçıxarma sektorunun Azərbaycanın qeyri-neft ixracının şaxələndirilməsində rolunun gücləndiyini göstərir.
