Özbəkistan Prezidenti Şavkat Mirziyoyev və Azərbaycan Prezidenti İlham Əliyev avqustun 23-də iki ölkə arasında Əbədi Dostluq haqqında Müqavilə imzalayıblar. Tərəflər, həmçinin 2030-cu ilədək ikitərəfli ticarət dövriyyəsini 1 milyard dollara çatdırmağı hədəflədiklərini açıqlayıblar.
Sənəd Prezident İlham Əliyevin Özbəkistana iki günlük dövlət səfəri çərçivəsində imzalanıb. İmzalanma mərasimindən əvvəl dövlət başçıları təkbətək görüş keçirib, daha sonra isə 2023-cü ildə yaradılmış Ali Dövlətlərarası Şuranın üçüncü iclasına həmsədrlik ediblər. Şura iki ölkə arasında uzunmüddətli strateji əməkdaşlığın əlaqələndirilməsi məqsədilə fəaliyyət göstərir.
Səfər zamanı liderlər bank sektoru, tikinti, təhsil, turizm, faydalı qazıntıların hasilatı və kənd təsərrüfatı sahələrində Azərbaycan sərmayəsi ilə həyata keçiriləcək bir sıra layihələri təqdim ediblər. Onların ən irisi Daşkənd vilayətindəki Çarvak su anbarının sahilində 577 hektar ərazidə inşa olunacaq, ilboyu fəaliyyət göstərəcək "Sea Breeze Uzbekistan" turizm və yaşayış kompleksidir. Layihənin investisiya dəyəri təxminən 5 milyard dollar qiymətləndirilir.
Prezident İlham Əliyev bildirib ki, neft və qaz yataqlarının kəşfiyyatı üzrə birgə layihələr artıq yekun mərhələyə yaxınlaşıb. Kəşfiyyatın nəticələri müsbət olarsa, hasilat quyularının qazılmasına 2027-ci ildə başlanılması planlaşdırılır.
Prezident Şavkat Mirziyoyev isə Xəzər dənizində birgə donanmanın yaradılması istiqamətində əməkdaşlığın genişləndirilməsi niyyətini açıqlayıb.
Səfər çərçivəsində pensiya təminatı, mədəniyyət, turizm, xarici işlər və ədliyyə sahələrində əməkdaşlığa dair bir sıra sazişlər də imzalanıb. Prezidentlər qarşılıqlı olaraq ali dövlət təltifləri ilə mükafatlandırılıblar: İlham Əliyevə Özbəkistanın "Oliy Darajali Dustlik" ordeni, Şavkat Mirziyoyevə isə Azərbaycanın "Heydər Əliyev" ordeni təqdim olunub.
Azərbaycan və Özbəkistan iqtisadi əməkdaşlığı son illərdə sürətlə genişlənir. Tərəflər 2023-cü ildə nizamnamə kapitalı 500 milyon dollar olan Azərbaycan–Özbəkistan İnvestisiya Şirkətini yaradıblar. 2024-cü ildə isə Müttəfiqlik Münasibətləri haqqında Müqavilə imzalanıb.
2025-ci ilin yekunlarına görə iki ölkə arasında ticarət dövriyyəsi 795 milyon dollara çataraq əvvəlki illə müqayisədə üç dəfədən çox artıb. 2026-cı ilin yanvar–may aylarında isə qarşılıqlı ticarət illik müqayisədə 33% artaraq 144 milyon dollar təşkil edib.
MONETAR.AZ
