Bu gün Asiya ticarət sessiyasında qiymətli metallar bazarında alışların güclənməsi fonunda qızıl fyuçersləri bahalaşıb. ABŞ dollarının cüzi zəifləməsi də qızıl kotirovkalarına əlavə dəstək verib.
Nyu-York Əmtəə Birjasının (COMEX) avqust tədarüklü qızıl fyuçersləri materialın hazırlandığı vaxt bir troy unsiyası üçün 4 129,05 dollar səviyyəsində ticarət olunub. Bu, əvvəlki sessiya ilə müqayisədə 1,29% artım deməkdir.
Texniki baxımdan qızıl üçün 3 963,00 dollar səviyyəsi əsas dəstək, 4 145,90 dollar isə yaxın müqavimət zonası kimi qiymətləndirilir.
Valyuta bazarında isə ABŞ dollarının altı aparıcı valyutadan ibarət səbətə qarşı məzənnəsini əks etdirən ABŞ dolları indeksi (DXY) 0,05% azalaraq 100,96 bənd səviyyəsində ticarət olunub. Dolların zəifləməsi ənənəvi olaraq dollarla qiymətləndirilən qiymətli metalların cəlbediciliyini artırır.
COMEX-də ticarət olunan digər qiymətli metallar arasında sentyabr tədarüklü gümüş fyuçersləri 1,30% bahalaşaraq bir troy unsiyası üçün 59,88 dollar səviyyəsinə yüksəlib.
Eyni zamanda, sənaye metalları seqmentində fərqli dinamika müşahidə olunub. Sentyabr tədarüklü mis fyuçersləri 0,21% ucuzlaşaraq bir funt üçün 6,52 dollar səviyyəsində ticarət edilib. Bu isə bazar iştirakçılarının qlobal sənaye tələbi və iqtisadi artımla bağlı gözləntilərini qiymətləndirməyə davam etdiyini göstərir.
MONETAR.AZ
