Bank of America analitikləri hesab edirlər ki, inflyasiya üçün risk təkcə neftin bahalaşması ilə məhdudlaşmır. Bankın qiymətləndirməsinə görə, enerji bazarındakı yüksək dəyişkənlik (volatillik) də qiymət artımlarını sürətləndirən amilə çevrilə bilər. Xüsusilə bəzi məhsul və xidmətlərin qiymətləri neft bahalaşdıqda yüksəlir, lakin xam neft ucuzlaşdıqda əvvəlki səviyyəyə qayıtmır.
Bankın təhlilinə əsasən, Hörmüz boğazında yaranan risklər və Qırmızı dənizdə husilərin hücumlarının yenidən intensivləşməsi kövrək atəşkəs fonunda neft qiymətlərinin növbəti dəfə kəskin yüksəlməsinə səbəb olub. Bu proses investorların aparıcı mərkəzi bankların gələcək faiz siyasətinə dair gözləntilərinə yenidən baxmasına gətirib çıxarıb.
Bank of America vurğulayır ki, ikinci dərəcəli inflyasiya effektləri qorunub saxlanılarsa, neft bazarındakı yüksək volatillik iqtisadiyyatda daha geniş qiymət təzyiqləri yarada bilər. Analitiklərin fikrincə, son beş ildə inflyasiyanın hədəf göstəricilərdən yüksək qalması fonunda mərkəzi bankların təklif şoklarını müvəqqəti hesab edərək onlara reaksiya verməməsi yanaşması artıq əvvəlki qədər effektiv olmaya bilər.
Hesabatda qeyd olunur ki, artan geosiyasi gərginlik nəticəsində enerji bazarında təklif şokları daha tez-tez baş verir və daha uzun müddət davam edir. Bu isə onların müvəqqəti xarakter daşıdığı barədə ənənəvi yanaşmanı zəiflədir. Bank hesab edir ki, belə şəraitdə risklərin idarə olunması daha çevik yanaşma tələb edir və inflyasiyanın öz-özünə səngiməsini gözləmək artıq kifayət etməyə bilər.
Bu gün bazar iştirakçılarının diqqəti ABŞ-da açıqlanacaq iyun ayı üzrə uzunmüddətli istifadə mallarına sifarişlərin ilkin statistikasına, eləcə də Dallas Federal Ehtiyat Bankının emal sənayesində işgüzar fəallığı əks etdirən indeksinə yönələcək. Həmin göstəricilər ABŞ iqtisadiyyatının vəziyyəti və Federal Ehtiyat Sisteminin növbəti addımları ilə bağlı gözləntilərə təsir göstərə bilər.
MONETAR.AZ
