Son illərdə müharibələr, sanksiyalar və əsas ticarət marşrutlarında yaranan risklər dəniz daşımalarının xərclərini artırıb. Nəticədə dənizçilik sektorunda fəaliyyət göstərən şirkətlər 2021-ci ildən etibarən təxminən 3,1 trilyon dollar nağd vəsait toplayıb.
Monetar.az xəbər verir ki, təqdim olunan məlumatlara əsasən, qlobal ticarətdə marşrutların dəyişməsi və dəniz daşımaları üzrə risklərin artması sektorda gəlirlərin əhəmiyyətli dərəcədə yüksəlməsinə səbəb olub.
Rusiya-Ukrayna müharibəsi və bunun ardınca tətbiq edilən sanksiyalar ənənəvi logistika marşrutlarında dəyişikliklər yaradıb. Eyni zamanda, strateji dəniz keçidlərində yaranan gərginliklər gəmiçilik şirkətləri üçün əlavə risk və xərc formalaşdırıb.
Sanksiyalardan yayınmaq üçün istifadə edilən alternativ və ya “kölgə donanmaları” da dəniz daşımaları sisteminin mürəkkəbləşməsinə təsir edən amillər sırasında göstərilir.
Marşrutların uzanması, risklərin artması və gəmi çatışmazlığı kimi amillər nəticəsində daşınma haqları yüksəlib. Bu isə xüsusilə böyük gəmiçilik şirkətlərinin gəlirlərinin artmasına şərait yaradıb.
Məlumatlarda qeyd olunur ki, qlobal ticarət zəncirindəki dəyişikliklər dənizçilik sektorunda son illərin ən yüksək gəlirlilik dövrlərindən birini formalaşdırıb.
