"Google Maps" tətbiqinin istifadəçi interfeysində bir sıra dəyişikliklər sınaqdan keçirilir. Qərb KİV-lərinin yaydığı məlumata görə, yeniliklərin əsas məqsədi səfərlər zamanı "Gemini" süni intellekt köməkçisindən istifadəni daha rahat və əlçatan etməkdir.
Hazırda naviqasiya rejimi aktiv olduqda "Gemini" ikonası ekranın yuxarı sağ küncündə yerləşir. Sınaqdan keçirilən yeni dizaynda isə bu düymə istifadəçinin baş barmağı ilə daha rahat çatdığı aşağı sol küncə köçürüləcək.
Eyni zamanda, naviqasiyadan çıxış düyməsinin sağ tərəfə keçirilməsi və daha nəzərəçarpan formada təqdim olunması planlaşdırılır. Alternativ marşrut seçimi düyməsi isə "Hadisə barədə məlumat ver" funksiyasının üzərində yerləşdiriləcək.
Yenilənmə "Ask Maps" funksiyasını da əhatə edir. Mövcud versiyada istifadəçilərə təqdim olunan tövsiyələr üfüqi kartlar formasında göstərilir və eyni anda yalnız iki və ya üç ipucu görünür. Digər təkliflərə baxmaq üçün siyahını sürüşdürmək tələb olunur.
Yeni interfeysdə isə bütün beş ipucu eyni anda ekranda əks olunacaq. Tövsiyələr üfüqi kartlar əvəzinə şaquli siyahı şəklində təqdim ediləcək ki, bu da onların daha rahat nəzərdən keçirilməsinə imkan verəcək.
Qeyd olunur ki, sözügedən dəyişikliklər hələlik sınaq mərhələsindədir və bütün yeniliklərin tətbiqin yekun rəsmi versiyasına daxil ediləcəyinə dair qəti qərar verilməyib.
MONETAR.AZ
