Yaponiyanın "Mitsubishi Electric Corp." və "Sony Semiconductor Solutions Corp." istehsalat sektorunda süni intellekt əsaslı həllərin inkişafını sürətləndirmək məqsədilə birgə müəssisə yaratmağa qərar veriblər. Tərəflər bildiriblər ki, təşəbbüs sənayedə davam edən işçi qüvvəsi çatışmazlığı və avtonom istehsal sistemlərinə artan tələbat fonunda zavodların rəqəmsal transformasiyasını dəstəkləməyə xidmət edəcək.
Şirkətlərin planına əsasən, tənzimləyici orqanların razılığı alındıqdan sonra 2026-cı ilin oktyabrında fəaliyyətə başlayacaq "Advanced Vision Solutions" adlı birgə müəssisədə "Mitsubishi Electric" 60%, "Sony Semiconductor Solutions" isə 40% paya sahib olacaq.
Yeni şirkət vizual məlumatları birbaşa təsvir sensorlarının (image sensor) üzərində emal edə bilən süni intellekt (Sİ) əsaslı sensor sistemlərinin hazırlanmasına fokuslanacaq. Bu texnologiya istehsal avadanlıqlarına iş mühitində baş verən dəyişiklikləri real vaxt rejimində aşkar etməyə, əldə olunan məlumatlar əsasında qərarlar qəbul etməyə və maşınların idarə edilməsini avtomatlaşdırmağa imkan verəcək.
Şirkətlərin qiymətləndirməsinə görə, yeni həllər istehsal proseslərinin keyfiyyətinin yüksəldilməsinə, proqnostik texniki xidmət (predictive maintenance) imkanlarının genişləndirilməsinə, həmçinin insan əməyindən asılılığın azaldılması və insansız istehsal konsepsiyasının inkişafına töhfə verəcək.
Tərəfdaşlıq çərçivəsində "Sony"nin təsvir sensorları və Edge AI texnologiyaları "Mitsubishi Electric"in zavod avtomatlaşdırılması və sənaye idarəetmə sistemləri üzrə təcrübəsi ilə birləşdiriləcək. Bununla yanaşı, müəssisə yalnız vizual məlumatları deyil, istehsal sahələrində müxtəlif mənbələrdən daxil olan informasiyanı da inteqrasiya edən multimodal süni intellekt sistemləri hazırlamağı planlaşdırır. Bu sistemlər anomaliyaların avtomatik aşkarlanmasına, istehsal proseslərinin optimallaşdırılmasına və insan müdaxiləsinin minimuma endirilməsinə imkan verəcək.
Şirkətlərin açıqlamasına görə, layihənin əsas məqsədlərindən biri Physical AI (Fiziki Süni İntellekt) texnologiyalarının sənaye müəssisələrində tətbiqini genişləndirmək və optika və ya süni intellekt sahəsində dərin ixtisaslaşma tələb etmədən müəssisələrin bu texnologiyalardan istifadə etməsini asanlaşdırmaqdır.
"Mitsubishi Electric" qeyd edib ki, yeni müəssisə şirkətin "Serendie" rəqəmsal istehsalat platformasını tamamlayacaq və Sİ əsaslı zavod avtomatlaşdırılması həlləri üzrə yeni biznes istiqamətinin formalaşmasına şərait yaradacaq. "Sony Semiconductor Solutions" isə tərəfdaşlığın sensor texnologiyalarının tətbiq imkanlarını adi görüntü əldə etmə funksiyasından kənara çıxararaq, onları birbaşa sənaye qərarlarının qəbulu və avadanlıqların idarə edilməsi proseslərinə inteqrasiya edəcəyini bildirib.
Bu əməkdaşlıq qlobal istehsal sektorunda süni intellektə əsaslanan avtomatlaşdırma həllərinə investisiyaların sürətlə artdığı bir dövrə təsadüf edir. Mütəxəssislərin fikrincə, Sənaye Süni İntellekti (Industrial AI) artıq məlumat emalı mərkəzlərindən kənarda süni intellekt texnologiyalarının ən sürətlə inkişaf edən tətbiq istiqamətlərindən birinə çevrilib.
MONETAR.AZ
