23 sentyabr dünyada Beynəlxalq Jest Dilləri Günü kimi qeyd olunur. Bu gün jest dillərinin əhəmiyyəti, kar insanların dil və mədəni hüquqlarının qorunması, eləcə də onların cəmiyyətə bərabərhüquqlu inteqrasiyasına diqqət çəkilir.
Monetar.az xəbər verir ki, Beynəlxalq Jest Dilləri Günü BMT Baş Assambleyasının qərarı ilə təsis edilib və ilk dəfə 2018-ci ildə qeyd olunub.
Beynəlxalq Karlar Federasiyasının məlumatına görə, dünyada 72 milyona yaxın kar insan yaşayır. Onların təxminən 80 faizi inkişaf etməkdə olan ölkələrin payına düşür. Ümumilikdə dünyada 300-dən çox müxtəlif jest dilindən istifadə olunur.
Jest dilləri sadəcə işarələr toplusu deyil, öz qrammatikası və quruluşu olan təbii dillər hesab edilir. Bu dillər vasitəsilə insanlar fikirlərini və məlumatları tam şəkildə ifadə edə bilirlər.
Jest dillərinin istifadəsi BMT-nin Əlillərin Hüquqları haqqında Konvensiyasında da tanınır. Konvensiyaya əsasən, dövlətlər kar insanların jest dillərini öyrənməsinə şərait yaratmalı və onların dil və mədəni kimliyinin qorunmasını dəstəkləməlidirlər.
Beynəlxalq Jest Dilləri Günü hər il müxtəlif mövzu və şüarlar ətrafında qeyd edilir. Bu tarix həm də kar insanların cəmiyyətin bütün sahələrində iştirakının təmin edilməsinin vacibliyini xatırladır.
