Avropa şirkətləri ikinci rübün maliyyə hesabatı mövsümünə mənfəət artımının genişlənməsi və daha dayanıqlı fundamental göstəricilərlə daxil olur. "Barclays" investisiya bankının analitikləri hesab edirlər ki, texnologiya və energetika sektorlarında yüksək gözləntilər davam etsə də, bu dəfə mənfəət artımı əvvəlki dövrlərlə müqayisədə daha geniş sektorlar üzrə müşahidə olunur.
Bankın qiymətləndirməsinə görə, ikinci rübdə Avropa şirkətlərində səhm başına mənfəətin (EPS) illik artımı 13%, ABŞ şirkətlərində isə 26% təşkil edə bilər. Bununla belə, analitiklər bildirirlər ki, energetika və texnologiya sektorları çıxıldıqda hər iki region üzrə gözlənilən artım təxminən 5%-ə qədər azalır. Bu isə ümumi mənfəət dinamikasının əsasən bir neçə aparıcı sektor hesabına formalaşdığını göstərir.
"Barclays"in fikrincə, neft qiymətlərinin sabitləşməsi, iqtisadi aktivliyin dayanıqlı qalması və valyuta məzənnələrinin yaratdığı təzyiqin zəifləməsi Avropada uğurlu hesabat mövsümünü dəstəkləyən əsas amillərdir. Bank həmçinin vurğulayır ki, şirkətlərin ikinci rüb üzrə ilkin korporativ açıqlamaları ardıcıl olaraq müsbət xarakter daşıyır. Belə dinamika sonuncu dəfə 2021-ci ildə qeydə alınmışdı.
Analitiklər qeyd edirlər ki, 2026-cı maliyyə ili üzrə mənfəət proqnozlarının yuxarı istiqamətdə yenilənməsi artıq yalnız energetika sektoru ilə məhdudlaşmır və iqtisadiyyatın daha geniş sahələrini əhatə etməyə başlayıb. Bu tendensiya Avropa korporativ sektorunda gəlirliliyin daha dayanıqlı əsaslar üzərində formalaşdığına işarə edir.
Bank 2026-cı maliyyə ili üzrə EPS artımını 12% səviyyəsində proqnozlaşdırır. Bu göstərici bazarın 17%-lik konsensus proqnozundan aşağı olsa da, son aylarda mənfəət gözləntilərinin yaxşılaşması fonunda "Barclays" öz daxili proqnozlarını artırıb.
Hesabatda vurğulanır ki, Avropa səhmləri cari ildə mənfəət artımını tam əks etdirmədiyi üçün qiymətləndirmələr nisbətən cəlbedici olaraq qalır. Bu amil, eyni zamanda, faiz dərəcələrinin yüksəlməsi risklərinə qarşı investorlar üçün müəyyən müdafiə elementi yaradır.
Bank investorlara süni intellekt texnologiyalarının inkişafından faydalanan şirkətlərin yüksək bazar qiymətləndirmələrini real maliyyə nəticələri ilə əsaslandırıb-əsaslandıra bilməyəcəyini diqqətlə izləməyi tövsiyə edir. "Barclays" ən güclü mənfəət dinamikası gözlənilən sahələr sırasında yarımkeçiricilər, maşınqayırma, bank sektoru, aerokosmik və müdafiə sənayesi, dağ-mədən və energetika şirkətlərini ön plana çıxarır.
Bundan əlavə, analitiklər ABŞ və İran arasında yenidən artan geosiyasi gərginlik fonunda energetika sektorunu investor portfelləri üçün taktiki hedcinq aləti kimi qiymətləndirirlər. Bu sektorun mümkün enerji bazarı risklərinə qarşı əlavə qoruma təmin edə biləcəyi bildirilir.
MONETAR.AZ
