ABŞ-da minik avtomobilləri üçün əvəzedici şin bazarı iyun ayında müsbət dinamika nümayiş etdirib. ABŞ Şin İstehsalçıları Assosiasiyasının (USTMA) açıqladığı məlumata görə, yüngül nəqliyyat vasitələri üçün əvəzedici şinlərin tədarükü ötən ilin eyni dövrü ilə müqayisədə 3,8% artıb. Bununla da bazar may ayında qeydə alınan 2,9%-lik geriləmədən sonra yenidən yüksəlişə qayıdıb.
"Morgan Stanley" analitiklərinin qiymətləndirməsinə görə, son göstəricilər dilerlərdə və distribütor şəbəkələrində anbar ehtiyatlarının korreksiyası prosesinin başa çatmaq üzrə olduğunu göstərir. Bank bu tendensiyanı şin sənayesi üçün ümumilikdə neytral amil kimi dəyərləndirir.
Bununla belə, ilin ilk yarısının nəticələri hələ də zəif qalır. Yanvar–iyun aylarında şin tədarükü 2025-ci ilin eyni dövrü ilə müqayisədə 4,6% azalıb.
USTMA statistikası assosiasiyaya üzv şirkətlərin, o cümlədən dörd Yaponiya istehsalçısının məlumatlarını əhatə edir. Lakin assosiasiyaya daxil olmayan şirkətlərin idxal etdiyi şinlər bu hesablamalara daxil edilmir. "Morgan Stanley" vurğulayır ki, xüsusilə ucuz idxal məhsulları bazarda mühüm amil olaraq qalır və rəsmi statistikada tam əks olunmur.
Kommersiya yük avtomobilləri üçün əvəzedici şin bazarında isə azalma davam edib. İyun ayında bu seqment üzrə tədarük illik müqayisədə 7,3% geriləsə də, bu göstərici ilin ilk altı ayı üzrə qeydə alınan 12,9%-lik azalmanı nəzərə aldıqda müəyyən yaxşılaşmaya işarə edir.
İlkin komplektasiya (OEM) bazarında isə fərqli dinamika müşahidə olunub. Minik avtomobilləri üçün OEM şinlərinin tədarükü iyunda 1,4% azaldığı halda, kommersiya yük avtomobilləri üçün bu göstərici 2,1% artıb.
Analitiklər əlavə edirlər ki, xam neft qiymətlərindəki dəyişkənlik şin istehsalında istifadə olunan xammalın maya dəyərinə təsir göstərməkdə davam edir. Eyni zamanda, benzin qiymətlərinin dəyişməsi avtomobillərdən istifadə intensivliyini formalaşdırır və nəticədə şinlərin dəyişdirilmə dövrünə birbaşa təsir edir.
MONETAR.AZ
